Gipuzkoako Foru Aldundiak eta Kutxa Fundazioak bultzatutako ekimenak ekintzailetza-programa berri bat jarri du abian, Gipuzkoaren potentzial zientifiko eta teknologikoa enpresa berritzaile berri bihurtzeko, industria-lehiakortasuna indartzeko eta nazioarteko talentua eta inbertsioa erakartzeko. Programak Columbus Venture Partners eta BeAble izango ditu partner estrategiko gisa, nazioarteko esperientzia emanez deeptech inbertsioan, transferentzia teknologikoan eta enpresa berritzaileen eskalatuan.
DeepTek Gipuzkoa Fundazioak gaurko prentsaurrekoan iragarri du Gipuzkoan oinarri zientifiko-teknologikoko enpresa berriak sortzeko eta bultzatzeko deeptech ekintzailetza-programa berri bat jarriko dela abian. Ekimena Gipuzkoako Foru Aldundiak eta Kutxa Fundazioak batera sustatu dute, ezagutza zientifikoa eta teknologikoa garapen ekonomiko, industria-lehiakortasun eta balio erantsi handiko enplegu bihurtzeko gai izango diren enpresa berritzaileen belaunaldi berri bat bultzatzeko helburuarekin.
Programa berriak oinarri zientifiko-teknologikoko enpresen sorrera identifikatu, lagundu eta bizkortuko du, talentua, ikerketa, industria, inbertsioa eta ekintzailetza lotuz.
Erronka estrategiko bati erantzuteko programa bat
Gipuzkoak oinarri zientifiko, teknologiko eta industrial sendoa du, eta deeptech enpresen belaunaldi berri bat bultzatzeko behar diren baldintzak eskaintzen ditu. Konplexutasun handiko aurrerapen zientifiko eta teknologikoetatik –hala nola adimen artifiziala eta algoritmia aurreratua, teknologia kuantikoak, bioteknologia edo blockchain– sortzen diren konpainiak dira, eta horiek garatzeko heltze-prozesu luzeagoak, inbertsio espezializatua eta esparru zientifikoaren, enpresa-sarearen eta industriaren arteko lankidetza estua behar dira, merkatura iritsi aurretik.
Horrelako enpresa-ekimenak sortzen eta hazten laguntzeko, DeepTek Gipuzkoa Fundazioak ekintzailetza-programa berri bat jarri du abian, ekintzaileei prozesuaren fase guztietan laguntzeko, aukera zientifiko edo teknologiko bat identifikatzetik hasi eta enpresa sortu, finkatu eta nazioartekotzeraino. Ekimenaren helburua da ezagutza merkatura transferitzen laguntzea eta enpresa-sare berritzailea, lehiakorra eta nazioarteko proiekzioa izango duena garatzen laguntzea.
Programak proiektu bakoitzaren beharretara egokitutako ibilbide bat eskainiko du, eta funtsezko bost zutaberen inguruan egituratuko da: talde ekintzaile osagarrien eraikuntza, merkatuaren konexio eta balidazio goiztiarra, finantzaketa espezializaturako sarbidea, laguntza pertsonalizatua eta nazioarteko enpresa, inbertitzaile eta ekosistemekiko konexioa.
Deeptech ekintzailetza gidatzeko prestatutako ekosistema
Ekimen hau Gipuzkoarentzat estrategikoa den une batean jarri da abian. Lurraldeak gaitasun zientifiko, teknologiko, industrial eta instituzionalen aparteko konbinazioa du, eta horrek deeptech ekintzailetzaren arloko Europako erreferentziazko ekosistemetako bat izateko posizio pribilegiatuan kokatzen du.
Eider Mendoza Gipuzkoako diputatu nagusiak hau nabarmendu du: “Gipuzkoak aparteko ekosistema zientifiko, teknologiko eta industriala du. Gure erronka da potentzial hori guztia pertsonentzako eta lurralderako aukera berri bihurtzea. DeepTek Gipuzkoa Fundazioarekin pauso erabakigarria emango dugu ezagutza, berrikuntza eta industria hobe konektatzeko, balio erantsi handiko enpresa berriak sustatzeko eta lankidetzan, lehiakortasunean eta berrikuntzan oinarritutako eredu bat finkatzeko.”
BPGaren % 2,75aren baliokidea den I+Gko gastuarekin –Estatuko eta Europako batez bestekoa baino handiagoa–, unibertsitateen, zentro teknologikoen eta ikerketa-zentroen sare indartsuarekin, Europako hegoaldeko industria-ehunik aurreratuenetako batekin eta lankidetza-kultura ezagunarekin, Gipuzkoak beharrezko baldintzak betetzen ditu nazioarteko merkatuetan lehiatzeko gaitasuna duten deeptech enpresen belaunaldi berri bat bultzatzeko.
Ekintzailearen ibilbide osoarekin batera doan eredua
Deeptech proiektu bakoitza heldutasun-maila desberdinetik abiatzen da, eta erronka espezifikoei aurre egiten die bere garapenean zehar. Horregatik, DeepTek Fundazioak ekintzaile bakoitzari erreferentzia egonkor bat eskainiko dio ibilbide osoan, aukera identifikatzen denetik enpresa sortu eta eskalatu arte. Hasierako diagnostiko batetik abiatuta, ibilbide-orri indibidualizatu bat definituko da, eta, fase bakoitzean, proiektuak modu koherentean, merkatura bideratuta eta anbizio globalarekin aurrera egin dezan beharrezkoak diren baliabideak, gaitasunak eta konexioak aktibatuko dira.
Ildo horretan, Eluska Sukia Kutxa Fundazioko Inbertsioen zuzendariak azaldu duenez, “DeepTek Fundazioak ekintzailea erdigunean kokatu nahi du, eta ibilbide osoan etengabe lagundu. Horretarako, funtsezkoa izango da zientzia eta teknologia merkatuarekin konektatzea fase goiztiarrenetatik, benetako beharrak kontrastatuz, erabilera-kasuak identifikatuz eta lehen bezeroei, industria-bazkideei eta balidazio-aukerei sarbidea erraztuz. Aldi berean, bikaintasun zientifikoa eta teknologikoa eta proiektu bakoitza konpainia bideragarri bihurtzeko behar diren enpresa-gaitasunak uztartzen dituzten taldeak eraikitzen lagunduko dugu. Hori guztia ibilbide pertsonalizatu baten bidez antolatuko da, finantzaketa espezializatua eskuratzeko aukerarekin, eta lehen egunetik nazioarteko ikuspegia izango du”.
Columbus Venture Partners eta BeAble: Gipuzkoa nazioarteko deeptech ekosistemarekin konektatzeko aliatu estrategikoak
Programaren elementu bereizgarri nagusietako bat izango da Gipuzkoan dauden indarguneak koordinatzeko duen gaitasuna. Era berean, ekintzaileei beren proiektuak garatzeko fase bakoitzean behar dituzten baliabideak, ezagutza eta konexioak eskainiko dizkie, potentzial globala duten ekimenak sustatu eta sendotu ditzaten.
Ekosistema horretan funtsezko zeregina izango dute Columbus Venture Partners eta BeAble aliatuek, programan partaide estrategiko gisa sartuko baitira. Bi erakundeak nazioarteko erreferenteak dira inbertsio espezializatuan, transferentzia teknologikoan eta deeptech enpresen sorreran, eta ezagutza aditua eta oinarri zientifiko-teknologikoko konpainien garapeneko eta eskalatzeko esperientzia emango dituzte, bai eta berrikuntzako, inbertsioko eta industriako nazioarteko sareetarako sarbidea ere.
BIC Gipuzkoak programaren kudeatzaile operatibo gisa duen zeregina betetzen jarraituko du, DeepTek Gipuzkoa Fundazioa sortu zenetik burutzen ari denarekin jarraitzeko. Esperientzia handia du ekintzaileei laguntzen, proiektuen bideragarritasuna ebaluatzen, enpresa berritzaileak sortzen eta ekintzailetzari laguntzeko tresnekin konektatzen, eta horrek aukera ematen dio funtsezko eragile gisa jarduteko programaren ezarpenean. BIC Gipuzkoak ezagutza eta esperientzia hori emango dizkie ekintzaileei prozesuaren etapa bakoitzean laguntzeko.
Testuinguru horretan, programak datozen bi urteetan ehun ekimen zientifiko-teknologiko inguru identifikatzea eta bultzatzea aurreikusten du, Gipuzkoako berrikuntza- eta ekintzailetza-ekosistema indartzeko.
Beste urrats estrategiko berri bat Gipuzkoaren etorkizunerako
Ekimenaren helburua da ekosistema sendo bat finkatzea. Talentua, inbertsioa eta hazteko aukera berriak erakarriko dituena, ezagutzaren transferentzia erraztuko duena eta Gipuzkoa oinarri zientifiko-teknologikoko enpresen garapenean Europako erreferente gisa sendotzen lagunduko duena.
Kutxa Fundazioko zuzendari nagusi Ander Aizpuruak azpimarratu duenez, “lurraldearen garapena epe luzeko ikuspegiarekin indartzeko tresna gisa ulertzen dugu inbertsioa. Deeptechen inbertitzeak berekin dakar konfiantza izatea balio osoa erakusteko eta merkatura iristeko denbora behar duten proiektuen talentuan, ezagutzan eta potentzialean. Gipuzkoako etorkizuna eralda dezaketen enpresa bihur daitezkeen ekimenak gaur babestu eta lagundu nahi ditugu”.
Programa hau abian jartzea Gipuzkoako Foru Aldundiaren eta Kutxa Fundazioaren apustu partekatua da, ezagutzan, berrikuntzan eta lankidetzan oinarritutako garapen-eredu baten aldeko apustua. Oinarri zientifiko-teknologikoko enpresen belaunaldi berri bat bultzatzeko, industria-lehiakortasuna indartzeko eta Gipuzkoak ekintzailetzan Europako erreferente gisa duen posizionamendua sendotzeko tresna bat.